Saturday, November 29, 2008

Nama Kebuah bahasa Iban enda ngerembai

Permas Jaya- Terubah ia lebuh aku betemu enggau kaban aku Jacob ti sama belajar enggau aku di UPSI, kami duai bisi berandau nama kebuah bahasa kitai Iban enda ngerembai. Ati aku bisi terkait ka nulis kebuah bahasa kitai enda ngerembai serta selalu dikena bansa kitai empu enggau endar. Ukai aku bejaku ngapa tang kemaya tu utai tu amat nyadi. Utai ti ngemalu ke endar bisi anak Iban enda nemu bejaku Iban endar..(nunjuk ka anak Iban di Menua besai). Utai ti ngemalu ke agi bisi ka nemu jaku iban tang enggai bejaku iban enggau bansa diri..utai tu kala nyadi ba aku empu.Pedis ati meda pemeli bansa diri ti ngeninggi ka bansa bukai ukai agi. Nya meh ti dikumbai orang Iban Sesat tauka Iban enda nemu diri. Taja aku diau di menua besai Johor Bharu tang jaku Iban agi diingat ke aku lalu selalu dikena enti bejaku enggau orang iban. Kadang-kadang enggau bansa bukai pan suah terpansut jaku iban aku..Nama endar pikir orang Iban ke enda nemu jaku diri lalu madah ka bahasa bukai berguna agi. Enti mina landik jaku orang putih serta Melayu, aku empu pan landik. Ukai mina jaku orang Inggeris serta Melayu aku nemu, jaku Peranchis enggau Indon pan aku landik. Tang laban pengeran ati ke jaku bansa diri mai bahasa Iban nyadi lingua franca ba idup aku. Pulai ngagai randau kebuah jaku Iban enda ngerembai tadi dia bisi mayuh amat kebuah. Antara ia:

(1) Anak enda diajar ngemerat ka jaku Iban- Tu endang amat laban ari mit anak diasuh belajar jaku orang putih serta jaku laut. Udah nya bejaku enggau anak ngena jaku nya tadi meh.

(2) Gaya idup ba nengeri besai- Ba nengeri besai, orang ti landik jaku orang putih enggau laut dikumbai orang pandai ( Mina bansa kitai aja madah kenya) tambah mega pangan sida ari bansa bukai

(3) Pangan anak kitai iban- utai tu siti meh kebuah.Enti anak kitai teleba bepangan enggau bansa bukai ia enda entu nemu ngemida ka ni jaku iban tauka jaku bukai, Jadi dalam jaku mudah dikumbai jaku rujak

(4) Bebini/belaki enggau bansa bukai- Tu mega amat. Amat enti kitai jadi enggau bansa bukai jaku kitai iban ulih ngerembai tang enda semua nyadi ngerembai. Kitai Iban tu jampat enda ingat ka bansa diri enti udah enggau bansa bukai( Ukai Semua). Kitai lalu ka nitih bansa bukai ari jaku. Enti dah bisi anak, anak enda diasuh laki kitai bansa orang bukai anang belajar jaku iban. Enti laki, enti bisi anak bini kitai ngasuh ia belajar ke bansa ia empu. Amat nyadi tu.. Aku udah mayuh pangan ka bakatu. Nyadi kaban aku tu apai ia iban tang indai ia bansa bukai. Apai ia tu antara Iban ti berduit serta berpangkat taja ia ari rumah panjai. Laban udah nyadi enggau bansa orang, anak ia enda diajar ia jaku iban lalu enda meh nemu jaku iban. Nya meh enti aku betemu enggau kaban aku tu dibai aku bejaku iban ia gining-gining enda nemu utai ka aku.

Aku minta ampun sema jaku aku diatas tadi bisi ngasuh ati pedis enti sema kena sebarang orang. Ukai aku jaku ngapa tang nya meh nunda ka jaku sempama sapa makai chabi ia meh nyepi pedas. Ni kala orang ti enda megai buah cemedak kena getah ia. Pia mega aku ngarap kitai iban sama bersaup ka jaku kitai. Sama meh kitai ngangkat ka jaku kitai. Uji kitai berunding, nama kebuah orang Iceland tauka Lithuania antara orang ti maju serta kaya ba dunya tang sida ia ngemerat ka jaku bansa sida ia. Nama kebuah ka kitai Iban ti jauh lebih mayuh ari sida ia enda ulih. Kitai bansa Iban dikelala ari pengering serta penguat kitai. Jadi nama kebuah kitai enggai ngena pengekih serta pengering kitai ngenan ka jaku kitai iban. Pia mega aku ngarap agi sekali sama meh kitai berserakup awak ka bansa ulih kering serta jaku iban ulih ngerembai ngagai serata menua.

”Enti ukai diatu kemaya agi,Enti ukai kitai sapa agi”

#Penulis meri besai gaga serta terima kasih ngagai anak iban ti bendar ngemaju serta ngelalaka bansa iban ba serata dunya baka unggal Ernesto enggau Jerry Kamit. Taja Ernesto anak iban ti bisi degree ba loyar tang pemerat serta pengeransing ati ia ka bansa diri mai ia enda nemu ngetu ngayan ka gaya serta adat bansa iban ba serata dunya.

#Pia mega meri besai terima kasih ngagai YB Datuk Patinggi Alfred Jabu, YB Datuk Douglas Uggah serta pemesai iban ke bukai ti nyukong serta angkun ka bansa kitai.

#Ngagai Pegari Iban Production, terima kasih udah ngaga magazine iban terubah. Ngarap udah tu kita ulih terus ngerembai ka magazine ngagai menua semenanjung Malaysia laban mayuh amat Iban ari menua Sarawak ti belajar tauka gawa di menua tu. Baka kami di UPSI mayuh amat bala Iban ti ila nyadi cikgu ke ngajar anak bansa kitai empu.Nadai salh enti Pegari ulih meri kami siti kolum ngagai nembiak iban ba universiti awakka ulih meransang bala adi,kaban serta anak iban awakka ulih masuk universiti. Jadi jaku menteri kita graduate siku sepintu ulih dikamat ka.

#Mupuk aku dulu....ila aku nulis baru enggau topik ”cikgu Iban UPSI” serta ”politik kitai iban serta tuai politik iban”.............

”Aram Berubah laban bedau Laun endur kitai Ngubah ia”

SARATOK: Jerita Asal Menua..(Hisstory of Saratok)

Jusco Permas Jaya – Bansa Iban kerebak ari tu sigi bansa ti udu bender mansang. Sereta enggau pemansang ia, bakanya ga menua Sarawak. Menua ka alai aku ada enggau menua ti endur aki-ini, indai serta bala kaban belayan aku ada tu pan enda tinggal majak mansang. Terima kasih ngagai YB Datuk Jelaing Mersat seduai YB Datuk Peter Nyarok ti ngemaju ka menua ti dikumbai “Madang Sawit Sarawak”. Bansa ti mayuh diau ditu ianya bansa Iban..(Ndang menua Iban..Keni ka enda mayuh), bansa Cina ti nguan pasar Saratok,Roban enggau Kabong lalu bansa ti penudi ianya bansa laut ti diau ba pasar sereta di tisi tasik ( “Laut” dalam jaku Iban ianya nunjuk ka “Melayu”, engka laban sida berumah ba tisi tasik tauka laut nya kebuah orang iban ngaga nama nya…Mr.Saban Sila, Sg,Bangkong,2002) Menua Saratok bulih nama kenu ka cherita diambi ari cherita ini orang ti ngenjuk utai ngagai siku orang iban lalu nyebut “serah tuk” dalam jaku laut Sarawak retinya enjuk tu. Jadi lingua franca ke dikena orang di Saratok ianya jaku Iban. Jaku Iban ke dikena orang Saratok nyadi bahasa Iban ti standard ti dikena ba sukat pelajar anembiak ba sekula maya tu. Terima kasih nagagi bala sida tuai-tuai kitai Iban suba ti ngering ka jaku diri empu. Menua tu udah ngada ka mayuh orang ti besai serta beberita ba serata menua. Antara sida ia:

(1) YB Datuk Jelaing Mersat -Ahli Parlimen Saratok/Sapit Menteri perintah Malaysia

(2) YB Datuk Peter Nayrok Entrie-Ahli DUN Krian/Menteri Muda Sarawak

(3) YB Abd Wahab Aziz-Ahli DUN Kalaka

(4) YBHG Datuk Edmund Langgu

(5) YBHG Datuk Seri Dustan Endawie

(6) Niang Datuk Seri Peter Tinggom Ak Kemarau

(7) YBHG Datuk Dominic Sulang

(8) EN.Leanord Martin Uning-Chairman Debessa Development Group/ Terubah iban ari menua saratok masuk Universiti ba luar negeri ianya Kanada. Bisi ga ari cherita ka didinga madah ka En.Leanord tu terubah iban belajar ba Kanada. En.Leanord tu kena apai tuai penulis empu(Samuel) ni enda aki penulis,Mr.Saban menyadi enggau indai Mr.Leanord ianya Pn.Semiri. Mr.Leanord mega kala nyadi seceatary YAB Datuk Patinggi Tan Sri Alfred Jabu serta nyadi residen bagi menua Limbang

Kebendar mayuh agi meh anak Saratok ke terbilang serta beberita.Enti sema bisi enda kena tulis aku minta ampun lalu ulih ga madah ka aku empu sapa agi awak ulih ditambah. Tambah mega aku benung ngaga research pasal Iban terbilang. Naka tu aja ulih ditulis aku maya tu. Mupuk aku dulu.....

Thursday, November 27, 2008

Selamat Datai

Selamat Datai ngagai Blog aku ti terubah digaga aku...Aku bebesai ati laban kita sanggup datai ngelawa blog aku. Tuju Blog tu digaga dikena aku mansut ka runding anembiak Iban ke rebak baru kelebih agi ari kami ti benung belajar ba Universiti...jadi ngarap ka kitai Iban & Dayak ulih nyukong blog bansa kitai empu..Nya dulu ari aku